Xəzər sahillərinin dəyişən ekoloji vəziyyəti və burada öz təsirini göstərən antropogen amillər müxtəlif bitki növlərinin qeyri-bərabər paylanmasına səbəb olur. Səhra bitkiliyi bu regionda ən geniş təmsil olunan və ən həssas bitki tiplərindən biridir. Bununla əlaqədar birillik şorangələrin dənizkənarı səhra fitotsenozlarının hazırkı vəziyyəti öyrənilmişdir. Birillik şorangəli səhraların müasir bitki vahidlərinin əvvəlki illərin bitki vahidləri ilə müqayisəli təhlili aparılmışdır. Xəzər dənizinin Azərbaycan hissəsinin sahilləri üçün yeni bitki vahidləri - birillik şorangə formasiyası Salsoleta tragosae və üç assosiasiya - S. kali subsp. tragus+Convolvolus persicus, S. kali subsp. tragus+Suaeda confusa, S. kali subsp. tragus+Limonium meyeri aşkar edilmişdir. Birillik şorangələrin növ tərkibinin inventarizasiyası aparılmış və dominant növlər müəyyən edilmişdir. Toplanmış material əsasında alfa və beta müxtəlifliyinin təhlili aparılmışdır.