Ferula L. (Apiaceae) cinsinin Qafqaz, Orta Asiya, Sibir, Çin (Sincan), Əfqanıstan, İran və Şimali Afrikada geniş yayılmış 130 növü vardır. Azərbaycan Respublikasında bu cinsin səkkiz növünə rast gəlinir. Ferula növlərinin tərkibindəki kimyəvi maddələrin əsas hissəsini seskviterpen kumarinlər, laktonlar, mürəkkəb efir spirtləri və efir yağları təşkil edir. Toxumların tam yetişmə mərhələsində toplanmış Ferula persica köklərinin etanollu ekstraktından sütunlu xromatoqrafiya üsulundan istifadə etməklə ilk dəfə olaraq C₂₄H₃₂O₅ tərkibli, ərimə temperaturu 157-159°C olan kristallik maddə alınmışdır. Spektral (UV)-ultrabənövşəyi, (İQ)-infraqırmızı, (NMR)-nüvə maqnit rezonansı PMR və ¹³C NMR, DEPT və iki ölçülü eksperimental üsullar COSY, HSQC, HMBC və fiziki göstəriciləri (polyarometriya, ərimə temperaturu) məlumatları əsasında tədqiq edilən maddənin moqoltavidinlə eyni quruluşa malik olduğu müəyyən edilmişdir. Maddənin konfiqurasiyasının təyin edilməsində PMR spektrdəki kimyəvi sürüşmə və spinspin qarşılıqlı təsir konstantının qiymətindən istifadə edilmişdir. Hazırkı tədqiqatın məqsədi F. persica köklərinin kumarin tərkibini müəyyən etməkdir. Bu nəticələrdə gələcəkdə cins daxilində növlərin xemotaksonomik mövqeyini müəyyən etmək üçün
qiymətləndirilə bilər.